27th April 2026 |
Open Consultations
Tá an Roinn Fiontar, Turasóireachta agus Fostaíochta (dá ngairtear ‘an Roinn’ anseo feasta) ag lorg tuairimí chun tacú le Straitéis nua um Chóiríocht Turasóireachta a fhorbairt d’Éirinn.
Tá an tionscnamh seo mar chuid de na gealltanais a leagtar amach i Ré Nua do Thurasóireacht na hÉireann, ag cinntiú go leanann Éire ag tairiscint eispéireas turasóireachta iomaíoch ar ardchaighdeán.
Tá ról ríthábhachtach ag cóiríocht turasóireachta chun tacú le geilleagair áitiúla, folláine pobail, agus eispéireas cuairteoirí níos leithne na hÉireann. Treoróidh an straitéis forbairt samhlacha cóiríochta traidisiúnta agus samhlacha cóiríochta atá ag teacht chun cinn ar fud na tíre amach anseo. Beidh an straitéis dírithe ar thacú le cothromaíocht réigiúnach, fás i gcinn scríbe atá ag teacht chun cinn, nuálaíocht a spreagadh, agus inbhuanaitheacht chomhshaoil, shóisialta agus eacnamaíoch a chinntiú.
Cúlra
Tá an Straitéis um Chóiríocht Turasóireachta á forbairt lena chinntiú go bhfuil meascán éagsúil cóiríochta dírithe ar Éirinn amach anseo a thacaíonn le forbairt fhadtéarmach earnáil na turasóireachta. I measc na bpríomhaidhmeanna beartais tá:
- Soláthar leordhóthanach agus cuí cóiríochta a chinntiú chun freastal ar riachtanais athraitheacha na gcuairteoirí agus chun tacú le fás fadtéarmach, go háirithe i gcinn scríbe atá ag teacht chun cinn a bhfuil acmhainneacht turasóireachta gan úsáid acu.
- Cothromaíocht réigiúnach a neartú trí infheistíocht a spreagadh i gcinn scríbe atá ag teacht chun cinn agus trí scaipeadh na sochar eacnamaíoch a fheabhsú.
- Tacú le nuálaíocht agus éagsúlú i samhlacha cóiríochta, lena n-áirítear roghanna atá inbhuanaithe ó thaobh an chomhshaoil de agus formáidí nua atá ailínithe le hionchais athraitheacha tomhaltóirí.
- Forbairt a ailíniú le hinbhuanaitheacht chomhshaoil, shóisialta agus eacnamaíoch, a chinntiú go dtacaíonn cóiríocht turasóireachta le gealltanais aeráide, go gcosnaíonn sí sócmhainní nádúrtha agus cultúrtha, agus go gcuireann sí buntáistí eacnamaíocha bríocha agus folláine fhad‑téarmach ar fáil ar mhaithe le pobail áitiúla.
- Feabhas a chur ar athléimneacht earnála, bunaithe ar dhúshláin a tharla le déanaí agus ar an ngá atá le bonneagar solúbtha, atá in ann dul in oiriúint don todhchaí.
- Ag ailíniú le dea-chleachtas san AE agus go hidirnáisiúnta maidir le forbairt turasóireachta inbhuanaithe agus bainistíocht fhreagrach ceann scríbe.
- Tacar sonraí um chóiríocht turasóireachta a fhorbairt a chabhróidh le meastóireacht a dhéanamh ar thorthaí beartais a eascraíonn ó Ré Nua do Thurasóireacht na hÉireann agus an Straitéis um Chóiríocht Turasóireachta.
Cabhróidh d’ionchuir le creat a mhúnlú a chomhlíonann riachtanais na gcuairteoirí, na ngnólachtaí agus na bpobal agus a chosnaíonn inbhuanaitheacht fhadtéarmach san earnáil ag an am céanna.
Éileamh reatha agus amach anseo
Cuimsíonn tairiscint cóiríochta do thurasóirí na hÉireann meascán leathan d’óstáin, tithe aíochta, Leaba is Bricfeasta, réadmhaoine féin‑fhreastail, brúnna agus cóiríocht lasmuigh amhail cochaill agus glampáil. Athraíonn acmhainn agus infhaighteacht go mór ar fud na réigiún, agus brúnna séasúracha nó buaic‑thréimhse roimh roinnt cinn scríbe agus acmhainneacht shuntasach fáis ag cinn eile.
Sa Straitéis um Chóiríocht Turasóireachta, breithneofar conas is fearr is féidir an soláthar a fhorbairt chun freastal ar riachtanais amach anseo ar bhealach inbhuanaithe agus cothrom - tacú le héileamh ar feadh ‑na bliana, fás a chumasú i gcinn scríbe atá ag teacht chun cinn, cumas leordhóthanach a chinntiú i gcás ina bhfuil brúnna ann, agus ailíniú le gealltanais chomhshaoil agus aeráide na hÉireann.
Comhthéacs rialála
Feidhmíonn earnáil cóiríochta turasóireachta na hÉireann laistigh de chreat rialála bunaithe faoi stiúir Fáilte Éireann faoi na hAchtanna um Thrácht Cuartaíochta 1939-2016, ina leagtar amach riachtanais chlárúcháin reachtúla agus caighdeáin cháilíochta do chineálacha sonracha cóiríochta. Tacaíonn an Creat Náisiúnta um Dhearbhú Cáilíochta (CNDC) leis an gcreat seo, trína ndéantar measúnú agus dearbhú cáilíochta ar sholáthraithe reachtúla agus neamh‑reachtúla araon-. Comhlánóidh an Straitéis um Chóiríocht Turasóireachta an creat atá ann cheana féin agus beidh sí ailínithe le beartais náisiúnta níos leithne a thacaíonn le turasóireacht inbhuanaithe.
Maidir leis an gcomhairliúchán seo
Tá tuairimí an phobail, páirtithe leasmhara tionscail agus gach grúpa leasmhar á lorg ag an Roinn mar go gcabhróidh d’ionchur sa chomhairliúchán le treoir, tosaíochtaí agus gníomhartha na Straitéise um Chóiríocht Turasóireachta deiridh a threorú.
Ba chóir go dtógfadh sé thart ar 15 nóiméad an suirbhé seo a chomhlánú. Féadfaidh tú freagra a thabhairt ar an oiread ceisteanna agus is mian leat agus moltar duit gan ach trácht a dhéanamh ar na hábhair is mó a bhaineann leat. Tugann an cheist dheireanach deis duit aon bharúlacha breise a roinnt a chreideann tú ba chóir a chur san áireamh.
Conas páirt a ghlacadh
Iarrtar tuairimí ó pháirtithe leasmhara agus ó grúpaí leasmhara tráth nach déanaí ná 5pm Dé hAoine, 29 Bealtaine 2026 tríd an nasc seo a leanas:
Déanfar anailís ar na freagraí a fhaightear faoin spriocdháta sonraithe agus cuirfidh siad le forbairt na straitéise deiridh. Foilseofar achoimre ar na haighneachtaí mar chuid den phróiseas comhairliúcháin.
Má bhíonn aon deacracht agat teacht ar an suirbhé nó é a chomhlánú, déan teagmháil le: TourismAccommodation@enterprise.gov.ie
Saoirse faisnéise agus cosaint sonraí
An tAcht um Shaoráil Faisnéise, 2014 agus Foilseachán na nAighneachtaí
Cuirfidh an Roinn gach aighneacht a fhaightear faoin gcomhairliúchán sin ar fáil ar a suíomh gréasáin. Tá sé tábhachtach a thabhairt faoi deara go n-áirítear leis sin d’ainm, do sheoladh, d’eagraíocht (más ábhartha) agus aon fhaisnéis eile a sholáthraíonn tú i d’aighneacht, mura n-iarrann tú orainn go sonrach an fhaisnéis seo a bhaint (a cheilt).
Féadfar faisnéis a sholáthraíonn tú a scaoileadh freisin má dhéanann duine iarratas faoin Acht um Shaoráil Faisnéise 2014.
Má tá sonraí pearsanta, faisnéis atá íogair ó thaobh na tráchtála de, nó ábhar rúnda i d’aighneacht nach mian leat a fhoilsiú nó a scaoileadh faoi iarratas um Shaoráil Faisnéise, aibhsigh an fhaisnéis seo go soiléir agus mínigh cén fáth go bhfuil sé íogair.
Déanfaidh an Roinn do thuairimí a bhreithniú agus cinneadh á dhéanamh aici ar cheart an fhaisnéis a scaoileadh agus, i gcás inarb iomchuí, rachaidh sí i gcomhairle leat sula ndéanfaidh sí cinneadh. Mar sin féin, ní ráthaíonn comhairliúchán leat go gcoinneofar an fhaisnéis siar. Déantar gach cinneadh maidir le nochtadh faoi Shaoráil Faisnéise de réir an dlí, agus féadfar faisnéis a scaoileadh go fóill fiú má iarrann tú a mhalairt.
Cosaint sonraí
Láimhseálaimid do shonraí pearsanta i gcomhréir leis an Rialachán Ginearálta maidir le Cosaint Sonraí (RGCS) agus leis an Acht um Chosaint Sonraí 2018.
Ciallaíonn sé sin go ndéanfaimid:
- d’fhaisnéis a úsáid chun críocha an chomhairliúcháin seo amháin,
- é a choinneáil slán, agus
- do chearta cosanta sonraí a urramú.
Is féidir leat tuilleadh sonraí a fháil faoin gcaoi a n-úsáidimid agus a gcosnaímid do shonraí inár bhFógra Príobháideachais ar ár suíomh gréasáin ag: Fógra Príobháideachta um Chosaint Sonraí
Topics:
Tourism