12 Márta 2024
Tá an tAire Fiontar, Trádála agus Fostaíochta, Simon Coveney TD, i mbun cuairte oifigiúla seacht lá san India agus sa Bhanglaidéis an tseachtain seo mar chuid de chlár Lá Fhéile Pádraig an Rialtais. Is ionann 2024 agus comóradh 75 bliain ar chaidreamh taidhleoireachta idir Éire agus an India, agus freastalóidh an tAire ar imeachtaí atá a n-eagrú ag Ambasáid na hÉireann i nDeilí Nua agus in Ard-Chonsalacht Mumbai chun an ócáid thábhachtach seo a cheiliúradh. Tháinig an tAire go Bengaluru Dé Luain, in éineacht le GFT Éireann agus Fiontraíocht Éireann, agus d’fhreastail sé ar shraith cruinnithe le cliantchomhlachtaí na ngníomhaireachtaí i rith an lae Dé Máirt.
Deir an tAire gur deis thábhachtach í an chuairt do chuideachtaí Éireannacha atá ag iarraidh gnó a dhéanamh san India agus d’Éirinn tuilleadh infheistíochta a mhealladh ón tír,
“Tá borradh faoin India agus táim anseo chun a chinntiú go dtagann cinntí a ndéantar i seomraí boird ó Dheilí Nua go Baile Átha Cliath i bhfabhar post Éireannach agus cuideachtaí Éireannacha. Buailfimid le feidhmeannaigh shinsearacha ó ilchuideachtaí móra na hIndia, le hinfheisteoirí, agus le fiontair bheaga agus mheánmhéide (FBManna), chun aird a tharraingt ar ár gcaidreamh trádála agus infheistíochta, caidreamh atá láidir agus atá ag fás. Táim ag súil go mór freisin le beocht agus cultúr na hIndia a fheiceáil agus lenár gcaidreamh déthaobhach mar náisiúin a neartú.”
Rachaidh an tAire Coveney go Mumbai Dé Céadaoin le haghaidh sraith coinní, lena n-áirítear fógra go bhfuil a dtríú hIonad Um Chomhchruthú Custaiméirí á oscailt ag Kerry Group na hIndia. Cuirfear deireadh leis an gcuairt le fáiltiú chun Lá Fhéile Pádraig a cheiliúradh, le ceol agus taispeántas de tháirgeoirí bia agus dí na hÉireann. I nDeilí Nua Déardaoin, reáchtálfaidh an tAire comhairliúcháin pholaitiúla agus tabharfaidh sé spreagaitheasc in Ollscoil Jawaharlal Nehru (JNU), áit a ndéanfaidh sé plé ar an gcaidreamh idir Éire agus an India, ar dhúshláin gheopholaitiúla reatha agus ar thiomantas na hÉireann chun rannpháirtíocht leis an India agus le réigiún an Aigéin Chiúin agus na hÁise a neartú.
Sa chuid dheireanach den chlár, rachaidh an tAire Coveney chun na Banglaidéise chun an chéad Chonsalacht Oinigh in Dhaka a oscailt go hoifigiúil agus chun sraith cruinnithe polaitiúla, trádála agus cruinnithe le pobail na hÉireann na Banglaidéise a reáchtáil.
Maidir le caidreamh idir Éire agus an India, deir Kevin Kelly, Ambasadóir na hÉireann leis an India,
“Tá áthas orm fáilte a chur roimh an Aire Coveney chun na hIndia agus na Banglaidéise do Lá Fhéile Pádraig 2024. I mbliana, tá Éire agus an India ag ceiliúradh 75 bliain de chaidreamh taidhleoireachta. Cuireann clár fairsing an Aire Coveney le linn a chuairte béim ar thiomantas na hÉireann chun naisc leis an India a dhoimhniú, le fócas láidir trádála, eacnamaíoch agus polaitiúil, le tacaíocht ó Fiontraíocht Éireann, GFT Éireann agus Bord Bia.
“Tá áthas orm freisin go n-osclóidh an tAire Coveney an chéad Chonsalacht Oinigh in Dhaka na Banglaidéise go hoifigiúil, ar ócáid thábhachtach í inár gcaidreamh leis an mBanglaidéis.”
Maidir leis an acmhainneacht ollmhór atá ann d’infheistíocht go hÉirinn ón India, deir Mary Buckley, Stiúrthóir Feidhmiúcháin GFT Éireann,
“Is í an India an tríú hinfheisteoir IDC is mó in Éirinn ó réigiún an Aigéin Chiúin agus na hÁise agus tá áthas ar GFT Éireann dul i gcomhpháirtíocht le 30 cuideachta Indiach a roghnaigh feidhmiú in Éirinn le láithreacht láidir i láithreacha réigiúnacha na hÉireann, agus a bhfuil os cionn 5,000 duine fostaithe lena n-oibríochtaí Éireannacha. Tugann Éire fíordheis i gcónaí do chuideachtaí Indiacha a bhfuil timpeallacht sheasmhach, shlán, ar son an ghnó le lucht saothair cumasach agus cultúr nuálaíochta agus fiontraíochta. Mar bhall tiomanta den AE, tá Éire cruthaithe freisin mar bhunáit chun láithreacht oibríochtúil a mhéadú i margaí na hEorpa. Táim ag tnúth le bualadh lenár gcliantchomhlachtaí le linn na cuairte seo agus leanúint lenár gcaidreamh a neartú, ní hamháin le cliantchuideachtaí atá ann cheana ach freisin le cliantchuideachtaí nua ó gach cearn den India.”
Maidir leis na deiseanna ollmhóra easpórtála a chuireann margadh na hIndia de 1.4 billiún duine ar fáil do chuideachtaí Éireannacha, deir Jennifer Melia, Stiúrthóir Feidhmiúcháin Fiontraíocht Éireann,
“Tá borradh mór faoi chuideachtaí Éireannacha go hidirnáisiúnta, rud atá á spreagadh ag an éileamh, atá ag méadú i gcónaí go hidirnáisiúnta, ar réitigh ó ghnólachtaí nuálacha Éireannacha chun dúshláin dhomhanda a réiteach. Tá ár n-éiceachóras taighde agus forbartha, atá den chéad scoth, mar bhonn agus mar thaca ag píblíne nuálaíochta na hÉireann, agus tá deiseanna suntasacha ann do níos mó cuideachtaí Éireannacha le hiad féin a bhunú agus a fhás i margadh spreagúil na hIndia, go háirithe i réimsí amhail TFC, eitlíocht, teicneolaíocht an airgeadais agus eolaíochtaí na beatha. Tá bonn láidir déanta ag ár n-ollscoileanna Éireannacha san India cheana féin, le 8,500 mac léinn Indiach ag staidéar in Éirinn i mbliana. Cuirfidh an misean trádála seo leis na ceangail ghnó agus oideachais atá ann cheana féin agus neartóidh sé iad, agus aithneoidh sé deiseanna do chomhpháirtíochtaí rathúla nua.”
CRÍOCH